اول حاجه لازم نعملها واحنا بنعامل اى طفل وخاصة طفل الروضه (سنه تقريبا من 3 الى 6 سنين ) اننا ننزل لمستواه ونستنى عليه شويه عشان يقدر يطمن لينا لان من طبيعة الطفل لما بيقابل حد غريب لاول مره لازم يحلله كويس اوى عن طريق نبرة صوته وتعبيرات وجهه وحركاته وطبعا بيرتاح اكتر للشخص اللى دايما بيبتسمله لان الطفل ممكن ميفهمش الكلام اللى بيتقال بس بيقدر يفهم اوى دلالة الملامح
والطفل فى المرحله دى بيعتمد على حواسه بشكل اساسى عشان كده اللعب هو بيبقى كل حياته وهو الطريقه الوحيده اللى بيقدر يتعلم بيها عشان كده نقدر نركز على وسائل الايضاح فى الخدمه وبتجيب نتيجه هايله فى تعليم الطفل وبيفضل الطفل فاكرها حتى لما يكبر وممكن ف السن ده نقدمله قصص من الانجيل زى حمار بلعام
وطبعا الطفل بيعشق ألعاب الهدم والبناء زى المكعبات مثلا
والطفل فى السن دى ممكن يلعب باى حاجه وطبعا هتبوظ اكيد بس ده مش عشان هو عايز يخرب لكن عشان هو عايز يعرف ايه ده؟ ايه جواه؟ بيتكون من ايه؟ وبيشتغل ازاى؟ وهى دى الطريقه اللى هيتعلم بيها ده حتى احنا ككبار لما بنشوف جهاز او حاجه جديده بنبقى هنموت ونعرف ايه حكايتها فما بالنا الطفل اللى لسه ميعرفش حاجه وبالنسبه له المجتمع ككل بيعتبر غريب عنه
ف الوقت ده ممكن تحاول الام انها تساعد طفلها على فهم الحاجات اللى حواليه طبعا مش كلها مره واحده بس تحاول تدريجيا معاه
وانشاء الله فيه امل